أحساسى بيك فايت الحدود [الأرشيف]

مشاهدة النسخة كاملة : أحساسى بيك فايت الحدود

Rakoba

12-02-05, 10:20 PM

كلمات د.عفاف الصادق وأبوعركى
ألحان وأداء أبو عركى

من زمن بعيد شديد خلاص أحساسى بيك فايت الحدود
وأنتى روحك سامية بى وكل يوم بتزيد تجـــود
غبت منك ورجعت ليك..لقيتك أنتى حبيبتى باقية على العهود
وعرفت أنك باقية لى وأنا باقى ليك
وعشت لوعة حب جميل غط المساحات والسدود
تاريك أنتى قدر كده..ومتغلة فينى بلا حدود..
تاريك أنتى الروعة الكلها فى الوجود
مشيت بعيد شلتك معاى سافرت بيك..لقيتك أنتى صباحى نور..
بيسبحى فى شرايينى وبستطعم حنين ريدك بخور
ومن قلبا شعوف وشفيق رسلت ليك الشوق عشان يشوفك كيف..
لاقاهو شوقك لى فارد جناحوالوريف.. ويتقالدو الأتنين...
بكو وبكو حتى دمع العين سأل شوقى قال ليهو رايح وين؟؟
رد شوقى وقال رسلنى زول ملهوف لزول حنين ولوف
تاريك أنتى قدر كده ومتوغلة فينى وبالألوف
تاريك أنتى الروعة الكلها فى الوجود ومتوغلة فينى بلا حدود

SudanRose

12-03-05, 12:52 AM

يديك العافيه ياراكوبه
ويخليك لى ناس مانقو
وتكتب لينا اغانى كمان وكمان

اغانيك دى كان كتييييييييييييره كده
انا عاوزه اغنيه انساك
ماعارفه كلمات منو لكن كان بغنيها فرفور
لو عندك عاوزه الاغنيه والكلمات:) :)

nany

12-03-05, 01:45 AM

شكلي كده حتعبك معاي ..............ياريت لو ممكن تكتب لي اغنية حنيني ليك لمحمود عبد العزيز اتخيل لي كده مامتأكده على العموم لو عاوز اي اغنية لمحمد الامين انا مستعدة لاني بحبو جدا.........صفقة موش؟؟؟

AgentSmith

12-03-05, 02:42 AM

بالجد اجمل كلمات الكلمات السودانيه

Rakoba

12-04-05, 10:00 PM

زهرة سودانا
أنساك انت انت بتتنسي لصلاح ابن البادية ، وفرفور متهجم سااااي :D ، ترقبيها قريباً خالص بصوت الرائع صلاح ابن البادية، وزي ما قالوا اهلنا سمح الغنا في خشم سيدو
شكرا مرورك الأنيق

ناني،
حنيني ليك اغنية الرائع محمد ميرغني ومحمود برضو متهجم :D ، وترقبيها قريباً في المنتدى، وأبو اللمين زاتوا لو عاوزاهو نجيبو ليكي ، صفقة كبيرة موووش.;)

العميل سميث :D
ياخوي ده اسم شنو، مرورك اسعدني وإنشاء الله هناك كثير في الراكوبة، فقط تخير ركنا فيها وسوف تستمتع معنا إنشاء الله
حبي لكم

Rakoba

12-04-05, 10:07 PM

كلمات اغنية أنساك
ولقينا في دنيا العيييييييون يا اغلى من النور غنا
سافرنا في دنيا العييييييون يا اصبا من النور غنا

فوق من رشاقة وامسيات باقات انيقة ملونة
الحان طروبة وشوشات أحرف موسيقى ودندنة
مالت قلوبنا عليك حنااااان تسلم عيونك ذوبتنا

انساك انت انت بتتنسي
ما انت روحنا وحبنااااا
سافرنا في عينيك ولسة.. قلوبنا بيك متجننة

طار المسا والكون صبح
عشاق جمال اتاملوا
كل الحروف الفي الخيال بي لهفة جات وما غلوا
حتى القمر حلولو النجوم... اتلفو فيك اتغزلوا

قالوا الجمال يا غالي بيك كانت نهايتو و أولو
نحنا في هواك يا غاااااالي لا.. لا بنطيق بعاد لا بنحملوا
اصلو المحبين الحناااان.. لا بنسوا لا بتحولوا

انسااااااااك.. انت انت بتتنسي
انساااااااااك.. يا غالي انتا بتتنسي
ما انت روحنا وحبنا.. سافرنا في عينيك ولسة.. قلوبنا بيك متجننة

SudanRose

12-05-05, 01:43 AM

شكرا ليك ياراكوبه والله مابتقصر:) :)

Rakoba

12-05-05, 11:05 AM

زهرة .. تفضلي ننساك بصوت فرفور من حفلة
وبصراحة بهدل الأغنية بهدلة !!

<EMBED SRC="http://www.rakoba.net/nansak.ra"VOLUME="85" HEIGHT="85" WIDTH="280"TYPE=Audio/x-pn-Realaudio-plugin EXTS=RA,RAM MASTERSOUND CONTROLS=SMALLCONSOLE AUTOSTART="TRUE">